يا باشا - ( قصيدة عامية ).

إهداء متأخر :

إلى روح ضحايا .. العيشة الحرة

------------------------

و النعمة يا باشا
إل قلب فى الورق
و قص و لزق
هما ولاد النتاشة
إل من نفس ضهر أبونا إسماعيل
والراجل المثقف
وإل عامل فيها مفتح
والواد إل لابد على ضلى
على ناصية الشارع
الواد ... عماشة
أكيد عارفه يا باشا
لما سمع مع السامعين
قصديتى الأولانية
إل فطت من تحت توب الغلب
من غير قصد و لانية
بتفوح منها ريحة قضية
عنى أنا
و حفيدى أنا
إل خايف عليه موت أنا
من طوق الكماشة
خايف
لو نطق .... الاقيه فى التوهه اسم على ورق
و تضمه فى العتمة حته قماشة
لامؤاخذة ياباشا
أي يا باشا
براحة ياباشا
انا لسه جوايا ( واحد بشر) يا باشا
اقول ؟
حقول يا باشا
- غلطة
- غلطة
- ارقص حبة يا بطة
- ارقص
- افلفل فلفل شطة
- العن ابويا و اخون اخويا و أعرى امى إل لقمتنى
الكلام حتة حتة
وماله ياباشا
بس عشان خاطر بقايا الإنسانية
بلاش تكون الأوضة فردانية
اصلى ... بصراحة
في عتمتها بشوف عماشة النضروجى
مية بتسلم مية
و بعرف إنى لو شق نفسي حضن السما
مش حيكون ليا و من بعدى حفيدى
ديه
والعظيم أنا
مش نمرود ... ابن نمرود بيتنمرد على الصحبة ديه
ده أنا المولود بلفظ آمين
ليوم الدين .. يا باشا
حرجع لولاد النتاشة
المثقف
والمفتح
وسيدى ( النضروجى ) عماشة
وهقول ... و اقول
إن الغلط فى الظلم ..حاشا
إن الغلط فى صاحب الظلم ... حاشا
إن الغلط فى ديــــن الظلم ..... حاشا
بس ... يا باشا
أعمل إيه فى حته جوايا طالعة نازلة فراشة
بتزغلل عينيا
بشمس لونها بجح
بيحضنها صبح عفى
مش من الضلمة
بتنجرح ؟؟