الزمن - قبل 2001 .. بكام سنة
ممكن حياتك تتغير بكلمة و تاخدك بعيد و خصوصا لما تبقى عايز تدخل آداب زيى كده ... و لكن لأن الآداب كلية متصيته بكلية الكعب العالى والكلام الحنين و الرمش الجارح يعنى مفيش هتبقى دراسة والحاجة قالت دى ( كلية بنات ) هتعمل إيه بالآداب ؟ مش مشكلة إنك بتحب الكتابة و لا القراية و لا بتدخل مسابقات فيها و بتكسب ولأنى مولود و القلم لازق فى صوابعى ... تجارة يعنى تجـــارة
تطلع منها محاسب قد الدنيا ... أو رجل أعمال !! معرفش جابتها منين .... بس ماشى
و لأن كان لسه العمر أخضر تمناشر - تسعاشر كده ... و الأدب غالب قلت اسمع الكلام و أنا كنت ثانوية - أدبى على ( قديمو) يعنى مدرستش ( رقم ) يوحد ربنا
و فجأة
محاسبة
و إدارة
و رياضة بحتة ... و عناوين مش فاكرها
و قابل يا معلم ... ( الترم شهرين ) الشباب التمام خريج القسم العلمى فاتحين - كورسات و مسائل ... و بتوع الأدبى .. زى كده مرة فوق و مرة تحت ... و لأن كلية التجارة ليها تطعيم معروف ... طلعت بمادتين
و السنة بقت سنتين
و جت تانية و تالتة و رابعة ... أفضى الصندوق و أملاه
و أخيرا بكالريوس ...
و جت الشهاااااااااااااااااااااادة
عملت بيها إيه ؟؟ .... ( أفضى و اكتب لكم الحلقة الجاية )
0 التعليقات:
إرسال تعليق