خليك معايا ...
تركب أى ميكروباص فى مصر و رغم إن مفيش حد يعرف فيه حد .. يا دوب مسافة السكة و تاخدنا الشوارع من تانى إلا إنك تلاقى استعداد عجيب للكلام .. السواق مع الركاب ..والركاب مع السواق .. والركاب مع الركاب . و لو ساكتين تلاقى ( رغبة ) برضه فى الكلام !
ممكن تكون محاولة فى ( قطع ملل ) السكة ؟
ممكن تكون حالة من ( الفضفضة ) مع حد لا طالبين قدامه نكذب أو نتجمل ؟
ممكن تكون رغبة فى ( لحظات حرية ) من خنقة زحمة الحياة ؟
و تركب ...
و يا إما تبدأ ( حوار ) ... أو تسمع حوار
أو تدخل فى ( حوار )
أو تلقى نفسك ( نسخة مكررة ) فى حوار
فاسمع ....
" حكاية رقم 1 "
الأبطال / السواق و الراكب ( إل جنبه )
الطريق / المحطة - سيدى بشر - ليلا .
أنا / الكرسى - ( خلف السواق مباشرة )
من كلمة لكلمة بينهم ... بقت راس الحكاية على شخصية ( أمين الشرطة ) إل واكلها ( ولعة ) .. و بدأ الراكب يبرهن على ( وجعه ) المسبق .
" أنا كنت سايق العربية ( دون أن يذكر ملاكى أو أجره ) و فجأة وقفنى أمين شرطة و هو بينده
- أقف يالاه ... أقف يالاه . - ( كده يبقى السواق راكب عربية أجرة 100%)
فركنت و المعلم جالى ( بيتغندر ) و قالى
-خدنى معاك على سكتك
فقلت ليه ..
- طيب كلمنى بطريقة كويسة إيه لازمة ( يالاه ) دى؟ - ( الراكب عامل له كده 40 سنة و شوية )
- لا هى دى طريقتى لو كان عاجبك
فركبت العربية و مشيت من غير ما أركبه معايا بس شفته فى المراية بيطلع ( الدفتر ) و بيكتب رقم العربية ... فرجعت ليه تانى - أنا عملت إيه دلوقتى علشان تاخد نمرتى ؟
كلمة منى كلمة منه ... اتخانقنا ( بالكلام بس ) و رحنا كلنا على القسم ... بس الأغرب إننا أول ما دخلنا القسم لقيته ماسك زارز مقطوع من ( البدلة الرسمى ) مع أنه كان معايا طول السكة و أنا ملمستهوش أصلا ... و اتعمل محضر فى قسم المنتزة و هو روح و أنا اتحجزت !! و قعدت أقول لنفسى أنا كنت ناقص و ده طلع لى منين ؟ يا حول الله ...
فلقيت شاويش قالى كده بوش مكشوف
- ببريزة كبيرة تخلص من الحوار ده و تروح النهارده - ( يعنى جوه فيه سوق كبير )
فطلعت 20 جنيه و أدتهم ليه و أنا قاعد فى القفص - بس هو أول ما شافهم قام راميهم ليا تانى .. فاستغربت
- مالهم دول إنت مش قلت بريزة ؟ أنا بديك 20
- لا يا أخويا أنا عايز بريزة كبيرة - أحسن ما تبات هنا و تروح النيابة الصبح وأنا أخلى المحضر ده كأنه محصلش
هههههههه المعلم طلع عايز 100 جنية حته واحدة
- و طلعت ؟
- طبعا طلعت 100 جنية ليه ... فسلمنى ورق المحضر بعد ما قطعه و قالى و أنت مروح أقعد قطع فيه و أنت ماشى
- طيب هو ليه بكره يسأل على المحضر ؟
- ملهوش حاجة عندى لأن ( ابن الهبلة ) نسى ياخد رقم المحضر
و أخدت المحضر ... و مشيت أقطع فيه فتافيت طول ما أنا ماشى ههههههههههههه - شفت ولاد الــ ........
الحكاية أخدتنا
والسكة عدت
و ضحكت بابتسامة ( مفتوحة مغصوبة ) من الغلب .
و إل تيجى محطته ينزل .....
0 التعليقات:
إرسال تعليق