يا ترى ... وطنى لسه بيكبر و بيتحرر ؟ - ( مقال )

يا ترى لسه الوطن ... بيكبر و بيتحرر ؟
عمنا اللواء " الموسيقار " محمد عبد الوهاب " سنة 1960 .. قال فى أبريت و لا أعظم " وطنى الأكبر ... بيكبر و بيتحرر " .
وفى كل مدرسة خريطة طول بعرض بتقول أن من المحيط للخليج فيه ( وطن عربى ) شايله حدود ( 22 ) دولة عربية 100%
و زى أى تلميذ عربى ... رددت 100 نشيد و كتبت بنفسى على الخريطة أسامى الدول و قلت أنا مواطن عربى فى وطن عربى ليه 22 علم عربى .
و كبرت ...
و قلت أبص على الخريطة ... و أشوف يا ترى لسه إحنا 22 دولة ؟
و لسه بتكلم عربى ؟
و لسه بنحب نكون بالعربى ؟
و فتحت الخريطة سنة 2010

موريتانيا :
من 50 سنة استقلال لسه مشكلتهم الرئيسية نتكلم عربى و لا فرنساوى الدستور
عندهم بيقول اللغة ( الفرنسية ) هى اللغة الرسمية مع إن فيهم 84% عرب و
16 % أفارقه .. و إل يفكر يقول لازم نتكلم عربى و نتعلم عربى يبقى عايز يعمل
فتنة بين عرب ( بالعربى ) و أفارقه ( بالفرنساوى )
و فرنسا تكسب
و ده فى بلد عربى
المغرب :
عاش الملك بس بعيد عن ( سبته و ملليلة ) و دول وخداهم أسبانيا ( بالدراع )
و مفيش كلمة تقول إن ده ( احتلال ) فى الشمال .
و حركة اسمها البوليساريو من 30 سنة عايز تاخد الصحراء المغربية و تعمل
دولة فى الجنوب
و لسه المشكلة فى المغرب من أحق العرب و لاالأمازيغ ( البربر ) ؟
و جالية يهودية عايز تخلى بأى طريقة الرباط – تل أبيب رايح جاى
و ده فى بلد عربى

الجزائر :
سنة 60 كانت بلد المليون شهيد و فى الألفية تتزايد الطوابير للحصول على معاش
قدمته فرنسا لكل من كان يتعاون معها اثناء احتلالها للجزائر(العملاء و الخونة يعنى )
لقضية بلادهم – و بعيد عن العداء و نكران دور مصر و تحويلها إلى ( مصرائيل ) و
أيضا دعم جبهة انفصالية زى البوليساريو ضد المغرب مازال يقولون ...
1-2-3 فيفا لارجرى.... ( بالفرنساوى )
و ده فى بلد عربى


تونس :
دولة تاريخها رئيسين واحد محرر و التانى ( حكم أبدى مدى الحياة ) – تم تصنيفها
دولة مدنية فيها ( البنت زى الولد مهياش كمالة عدد ) حتى فى الميراث دورها فى
التاريخ العربى ( سافا ... كازبالانكا )
و الفرنساوى شغال ...
و ده فى بلد عربى
ليبيا :
اللهم أجعله خير الدنيا هناك كلها أخضر فى أخضر – كتاب أخضر – و علم أخضر
و فكر سياسى برضه لسه أخضر
و يكفينا منها ( إسراطين ) لحل قضية العرب الأولى بين ( إسرائيل – و فلسطين )
و عاشت الجاماهيرية – العربية – الليبية – الإشتراكية – ( العظمى ) !
طالما الكلام ببلاش
و ده فى بلد عربى
مصر :
الغاز من عندنا – قفل المعبر من عندنا – ضرب المقاومة من عندنا – طابا سياحة
إسرائيلية عندنا - بذور مسطرنة جبناها عندنا –
نتياهو
و لبيبرمان
و باراك
و بيريز .. أصدقاء عندنا
و قاهرة الريادة رااااااااااااااااااااااااحت مننا
( مش هتنكلم ... مش هنذيع .. بس هنجبر الشعب على التطبيع )
بقه شعار فى مصر ( عندنا )
و ده فى بلد عربى
فلسطين :
دولة على ورقة – و سلطة من ورق – وقضية واقفة فى أخر طابور الصراع على
سلطة مجتش – و مفاوضات منجحتش – و مقاومة فى ( الكلتش )
و أخيرا شوية ناس قليليين – لسه مخنتش
و بتقرا التاريخ .... يمكن يفضل اسم فلسطين على الخريطة و مستسلمتش
و ده فى بلد عربى
لبنان :
الدلع كله جنوب ( عربى ) ولاءه لإيران – و مورانة ( عرب ) ولائها لفرنسا
و ( كتائب ) ( عرب ) ولائها لإسرائيل !! و سنة رايحين جايين مع الورقة إل
كسبانه ... و دروز ( بأجندة )
و سلاح فى كل حتة – و مهاجرين فى كل حته
و عاشت – نانسى و هيفا ... و أى مطربة عاملة فيها حته
و ده فى بلد عربى
سوريا :
صاحبة اختراع ( التوريث الجمهورى ) لتصبح تجربة توشك على التكرار فى نظام
( الجمورلكية ) العربية ... و قريبا فى مصر
تنادى بالمقاومة ... و لم تطلق رصاصة منذ 73 لتحرير هضبة كاملة تسمى "
الجولان " ( مازاااااااااااااااالت محتلة )
و ده فى بلد عربى
العراق :
مبقاش عنده غير ...
- مين مات ؟ مين عاش ؟ / مين مع إيران ؟ مين مع أمريكا ؟ / مين يحكم ؟ مين يعدم ؟
مين عربى ؟ مين كردى ؟ مين تركمان ؟
مين سنى ؟ مين شيعى ؟ مين مسيحى ؟
مين مع حرية أمريكية ؟ مين مع قومية عربية ؟
الأمريكان ماشيين ؟ الأمريكان قاعدين ؟
و كان الله فى العون فى زمن حرية ( آل بوش )
و أونكل ( أوباما ) و طنط ( كلينتون ) ... و الحاج ( المالكى )
و ده فى بلد عربى
الأردن :
لم تختلف منذ نشأتها عن اختيار المواقف التى تدعم مصلحة الحفاظ على العرش و
رضى القوى العظمى –
تتميز بالصراحة و الوضوح – أثناء ( بجاحه ) تطبيع لا ينتهى مع طنط ( ظاظا )
و ده فى بلد عربى
السعودية :
علاقات ( فرندس ) مع رؤساء ( ماما أمريكا ) – أموال ( بالكوم ) تمثل 17% من
أقتصاد ( ماما أمريكا ) – رغبة مؤكده فى السيطرة على ميراث مصر الفنى و السياسى
والدور الأقليمى ... و ( كله بفلوسى ) و رضا ( ماما أمريكا )
و ده فى بلد عربى
اليمن :
توغل نقوذ القاعدة - مظاهرات تصالب بإإنفصال الشمال عن الجنوب ( يعنى يبقى
دولتين ) – حرب مع حوثيين و إيران ...
و أمريكا تأمر و تنفذ عمليات قتل بالوكالة
و عاشت سياسية ( القات ) و خطب ( الشعارات )
و ده فى بلد عربى
الكويت – قطر – البحرين
الغاليين الحلويين حبايب ( ماما ) و ( بابا ) ... إل طالما القواعد موجودة و القوات الأجنبية
موجودة يبقوا ( مبسوطين ) ... و أصحاب بلد ( حقييقين )
و إل ميلقيش دلع و ما يتدلعش .... يبقى حرام عليه
فى دويلات ( مغارة ) على بابا
و ده فى بلد عربى
السلطنة – الإمارات
بيقولوا أن الحلم العربى ممكن يتحقق بشوية خوف على البلد ... التجربة لسه حديثة
بس ممكن نعدى لو كان حلمنا بجد
و لكل قاعدة ( شواااااااااااااااااااااذ )

و ده فى بلد عربى

السودان :
راح منها الجنوب و راح منها " الأقليم " و بقت درافور لكل من هب و دب و استفتاء
بالانفصال لناس تانية و لغة تانية و دولة تانية نتيجة تصرفات غلط × غلط من سنين
و بقى السؤال ... مين هتكون أكبر دولة مساحة فى الوطن العربى ؟
لو اتمزق السودان ؟

و ده فى بلد عربى


الصومال :

لأنها دولة ( بنت البطة السودة ) لو ولعت ملهاش حد ... و من 17 سنة يبقى الوضع
على ما هو عليه
حكومة تيجى / معارضة / حرب شوارع / حكومة تمشى /حكومة تيجى
معارضة ....
لغاية ما الشعب الصومالى ( العربى ) خلص
و لسه ( مجاش ) الحل العربى
و ده فى بلد عربى

جيبوتى – جزر القمر :
دولة من ماركة ( لا بهش و لا انش ) تتبع سياسية ( خليك جنب الحيط يحتار عدوك
فيك ) و مد إيديك الله يعطيك .
أموت و أعرف مين عدها على الخريطة ؟


خلصت منى الخريطة

و بقى معايا سؤال
فاضل كام دولة فعلا فى الوطن العربى إل بيكبر و بيتحرر ؟؟