خالى شغل - ( 8 )

ملحوظة هامة :

يعتذر الكاتب عن أى تشابه مع الأسماء ... و لكل شخصية كل الاحترام

و التقدير ... و هذا حق لابد منه
فكان الهدف فقط سرد تجربة و ليس النيل من احد .
و سيظل لى حق الاحتفاظ بالتجربة


إذ لما اتعرض اتعرض حلمى لحالة " نصب فكرى " ... و تلاعب " بقلة خبرة " كانت بتقولى إن إل لابس نضيف مش يسرق .. إل بيقرا مش يسرق .. إل حقق حلمه مش يسرق .. و بما إن النظرة دى عندى باظت على إيد سليفة الذكر مخرجة التليفزيون " ماجدة عبد السلام "

قلت " عينيك فى وسط راسك " و كفاية كده .

بس مش من أول جولة " راح أسلم " .. و إل بيشوف يا ما بيتعلم ... بس فين الطريق ؟

أدور فى الدفاتر و المعارف و معارف المعارف .. - إل يقول مش عارف أو لحد يعرف مش عارف ...

- يا بنى اشتغل بشهادتك أحسن ... إعلام إيه بس ؟

بشوية معاندة على مكابرة على معافرة .. كنت برد على أى حد

بس أكيد كان جوايا نفس السؤال

- الشهادة أضمن ؟ .. و لا حلمى و موهبتى أضمن ؟

بالشهادة فى ظرف يومين اشتغل و أمسك كام " جندى " - يعنى جنيه مصرى بطريقتنا - و أكون فى المضمون ... بس أنا و الأرقام بينا عداوة " ربانى " بكرها جدا و هى كرهانى .. و كفاية بقت 4 سنين " أرقام "

أنا إعلام يعنى إعلام

بس الطريق التانى ؟ إزاى و فين؟

- تررررررررررررررررن ( جرس الباب )

- بفتح - خالى يقف فى المواجهة .

- ( بتورد كده ) .. عندى ليك خبر حلو .

- خير ؟

- أنا قابلت ولية أمر عندى فى المدرسة و كلمتها عنك و قالت ليا خليه يكلمنى ده أنا أخلص مشواره ده فى أسبوع ... و متخلهوش ينعى الهم

( ساعتها )

هو يتكلم ... و أنا داخل ليا ( أوكسجين فريش ) من كل حته .... الحلم بيرجع تانى ... و حد من ( المعارضة سابقا ) بدأ يساعدنى ...

- إيدى على كتفك . ( بهدوء ظاهرى )

- هنكلمها على الساعة 5 النهارده .

جمعت الساعة و طرحت الزمن فضل ليا ساعتين من الانتظار ... قلت يا لا " العبد فى التفكير و الرب فى التدبير "

و بنفس عمييييييق ..

دخلت الساعتين فى حوار " تخليص حق " مع ماجدة ... و اتخيلها و هى لاقيانى واقف قدامها " مذيع رسمى "

و تك تك تك تك .... مرت الساعتين

وألوووووووووووووووووووووووو

خالى فتح المكالمة فى كلمتين و بسرعة ناولنى السماعة وفيها " صوت أنثوى "

- ألوووووووووووووووووووووووووو

- ( أيوة يا إسلام ... و بعدها فتحت فى الكلام إل رفعنى هوا لسابع سما ) -

... و أخيرا عينيا يا إسلام أنت بس كلمنى على الأسبوع إل جاى أكون عملت اتصالاتى .

- بصوت( مكتوم بفرحة بترقص ) .. شكرا يا مدام " ف"

خالى قرا على وشى النتيجة

بسرعة لقط السماعة ... و قال كلام لازم يتقال - ألف شكرا و يارب كده نردها فى ... و فى ,,, و فى .... ( المهم ناس تعرفهم )

و قفل

و أنا بدأت أعد أول ثانية من الأسبوع .

و جه اليوم السابع

حصل إيه ... ؟ ... قالت إيه ؟ ... قلت إيه ؟

( أفضى ... و اكتب لكم ) .