من النهاردة مفيش ... 6أكتوبر - ( لازم اتكلم قبل ما أطق )

بما إن النهارده 6 أكتوبر
يعنى كل ( شاشة ) فى مصر هتديها فقرات تسجيلية .. دبابات على طايرات على نشيد ( الله أكبر ) .. على فتحة صدر محمود ياسين و هو ( مازالت الرصاصة فى جيبه ) .. و تسريحة حسين فهمى وهو بيعبر القناة ( ياى ) .. و طبعا فى نهاية اليوم هتنزل فواصل ( مصر العبور .. مصر السلام ) .. و مع الساعة 12
يخلص اليوم ...
و بكرة فى كام جريدة هتلاقى مانشيت بــ 100 تصريح من ( روس ) جميع المقاسات ( بتحلف ) بتضحيات مصر .. و إحنا كمان لازم نصدقها رغم إنى فعلا من مواليد جيل السلام 1977 .. يعنى جيت الدنيا ( مع جيل بحاله ) بعد ما خلصت الحكاية .. و بعدنا جه كام جيل .. ( يعرف ) اللمبى أكتر من ( عبد العاطى ) صائد الدبابات و سعد الشاذلى و عادل سوكة و غيرهم من أسامى عملوا بطولات ولا ( رامبو ) فى عز شبابه .. بس علشان السلام و عيون السلام .. ماتت أسامى كتير / و بقه ( مناحم و جولدا ... و شامير .. و رابين .. و باراك و شارون .. النتن ياهو ) نجوم على الشاشات العربية الحرة المستقلة ...
و بما إن حرب أكتوبر مر عليها 37 سنة .. قلت أمسك ورقة و قلم و أشوف أنا أعرف و بعيش أى 6 أكتوبر ... ؟
بكرة أجازة ... جملة بيقولها كل الجيل إل جاى بدماغ متبرمجة على mb3 – و الفيس و – الجيمز – و الدونلودز ... يعنى الأجازة بتتقضى بدماغ ( العولمة ) و إل مات .. مات و إل حارب حارب ... الحرب دلوقتى فى كوكب ( الأشرار ) و البطل ..هو( الرجل الحديدى ) و ال( النينجا ) و ( الخارقون ) و ( المتحولون )
و النهارده 6 أكتوبر ( يوم النصر ) !

- تصريحات .. من كل شكل ولون و خصوصا لما تبقى الانتخابات على الأبواب وأسعار ( البلطجة ) نار ... و تجهيز ( الميليشيات ) علشان تجريس و تشويه و إسقاط المرشح المنافس .. حتى تكون فعلا ( مصر قوة .. مسلحة .. رادعة ) بالسلاح الأبيض و السنج و مية النار ) ... ضد أبنائها .
و النهارده 6 أكتوبر ( يوم النصر ) !

- حفلات ... شباب هربان من الجيش بيغنى لمصر و للدفاع عن مصر و عن حب مصر نيابة عن 100 ألف شهيد مصرى بجد .. و ينزل

من على المسرح و يالا ( موزتك ) .. و ( هامرك ) ..و ( فيلتك ) .. و بالسلام إحنا بدينا بالسلام
و النهارده 6 أكتوبر ( يوم النصر ) !

- قصقصة الريش .. لكل لسان بيقول مصر أكتوبر 73 انتصرت .. مصر 2010 خسرت ( بصفر ) المونديال .. و النهارده يوم 6 أكتوبر و مصر مفيهاش صوت الإعلامى ( عمر أديب)..النهارده 6 أكتوبر و مصر مفيــــهاش لاصوت وصورة ولا قلم إبراهيم عيسى ... النهارده 6 أكتــوبر ووائل الإبراشى مهــــدد بالسجـــن والنموذج المصرى المشرف ( البرادعى ) ... تفتح عليه نيران التشويه مع كل طلة شمس
و النهارده 6 أكتوبر ( يوم النصر ) !

- طماطم مصر ... بتتحدى أسعار الدهب فى بلد أرضه اتولدت من الزراعة و عاشت على الزراعة واحتلها المحتل علشان خير الزراعة و جه المستثمر العربى و الأجنبى علشان الزراعة ... و النهارده 6 أكتوبر ... و مصر مفيهاش زراعة
و النهارده 6 أكتوبر ( يوم النصر ) !

- فتنة ... 73الطلقة الإسرائيلى مفرقتش .. 2010 بين مع الفراغ و الكبت و الشحن و الطحن والبطش و فتح مساحات التخريف و التخويف و الأسلمة و التنصير و حق حرية ( البعير ) .. أصبحنا نصنف و نتصف على ( الهوية )
هنا إسلام .. و هناك مسيحية .. و نتجه للمجهول .
و النهارده 6 أكتوبر ( يوم النصر ) !


طيب فين أكتوبر التاريخ ؟ ...

دور هتلاقيها ... مجرد رسم مهزوز محشور فى كراس رسم لــ (عيل بمريلة ) .. بيرسم هو نعسان .. علشان بس الميس بكرة ... (هتضرب ) .
مش أكتر