و الله و (ماعمالوهاش ) الرجالة - ( لازم اتكلم قبل ما أطق )

مرة واحدة .. ( طلعت ) فى دماغ شوية ( مستوطنين يهود ) إنهم مع طلعة شمس 6 أكتوبر 2010 .. كل واحد يقف منهم على الحدود المصرية – ( عفوا ) الإسرائيلية بعلم – ( عفوا ) إسرائيلى والهدف فيهم واضح .. ( شتيمة ) مصر ... و نرفزة ( جنود مصر ) ... و الجيش بتاعهم طبعا عامل مش شايف .. مش سامع ( كالعادة ) .. و السبب أن مصر بتحتفل بــ 6 أكتوبر .. يعنى يا جدعان بعد 37 سنة لسه ( وجعاهم أوى ) .
ولأننا بقينا من بتوع بالسلام .. إحنا بدينا بالسلام .. جت الأوامر ( بضبط النفس ) لجنود مصر للمرة الـــ1000 من تاريخ المعاهدة .. بس اللافت للنظر أن ( قطعان المستوطنين ) شباب ( ورور ) بكل تأكيد لا عاش و لا شاف ... لا أكتوبر ولا كيبور و لا حرب عيد الغفران ... بس واقفين ( فاهمين عارفين ) إن ( سينا ) فى تاريخهم .. أول هزيمة ( مرمطة ) .
قلت يبقى ( يا جدعان ) السنة دى لازم نفرح أكتر .. و أكتوبر السنة دى لازم ( يولع ) بمظاهرة ( فرح و نصر ) من شباب ( متلفح ) بعلم مصر ... و ضارب على وشه ال 3 ألوان علشان يعرفوا إن فيه شاب ( حى ) بيعرف يرد على ( المقهورين ) .. و انتظرت حاجة تعدى .
- مستنى واحد بياع ( أعلام ) يعدى .. !
- مستنى أسمع أغنية ( و الله عملوها الرجالة ) من أى عربية !
- مستنى أشوف " جحافل " الطبول بتردد و إحنا معها تا – ترات – تا ... مصر . !
- مستنى ( أنزل ) أشوف شاشة فى ميدان ... بتقول لكام ( جيل مصرى ) إحنا أهوه .. خليكوا
فاكرين .
بسسسسسسسسسسسسسس
الدنيا كلها ( سمع هس ) ... الكل بيطبق نظرية ( ما خلصت بح ) ... عيش يوم ( أجازتك )
شوف ( موزتك ) و بوس إيد ( حماتك ) ... أو ( انتخ ) و ريح العضمتين الشقاينين .
علم مين ؟
حرب مين ؟
مظاهرة مين ؟
... ده الرجالة ماتت فى 73 .
و على الردود .. راح تسمع 100 رد ( جاهز و متعبى )
لأن مصر 2010 ... برضه مصر عبرت مرتين .. مرة فى موقعة أم درمان و كانت ملحمة
( المنتخب المصرى × المنتخب الجزائرى ) .. و أخيرا ..موقعة ( ستاد القاهرة ) لما قدرنا نوقف ( غزو ) الألتراس ( التونسى ) .. و حقـــقـنا النصر و الدنــيا اتضربت أحمر × أحمر
يعنى مصر دايما ( من نصر لنصر )
يبقى فيه إيه ؟؟
علم مين ؟
حرب مين ؟
مظاهرة مين ؟
... ده الرجالة ماتت فى 73
و خصوصا لما الكورة فى مصر بقت بتفك أزمة الدستور .. الكورة فى مصر ( بتحقق ) كل يوم عبور بقاذفات " أبو تريكة " و مدفعية " وائل جمعة " و صواريخ " أحمد حسام " ... و كفاية علينا ( طلة ) أونكل ( جمال ) و أبيه ( علاء ) ... شايلين كاس النصر .
هنا وبس العلم المصرى ( المستحى ) طول السنة يطلع و يرفرف ... ولو كان تمنه 50 جنية .. أما حرب و شهدا و نصر حقيقى - " فكك بالبنط العريض " و يا بخت من ( زار و خفف ) .

رغم إن ( ماما ) أمريكا ... سرقت أرض و دبحت شعب و بعدها عملت عيد و قالت ده (ااستقلال )..
( إسرائيل ) سرقت و بتسرق أرض .. دبحت و بتدبح ( شعب ) و برضه عملت عيد و قالت ده (استقلال ) !! ...
و مع شوية ( أعلام و أفلام و تى شيرتات و حكايات ) .. بقه ليهم تاريخ ( بلوى الدراع ) ولازم الكل يقول .. ده استقلال .
و أديها احتفالات( حقيقية ) للصبح ..

أما دولة زى مصر رصيد ( تاريخها ) المجمد بس قدامه 3 أصفار .. وعندها نصر ( حقيقى ) ... بنلخصه بالكامل فى ( شوية (ذوووكريات – و فيلمين متحنطين و شوية أغانى ) .. لأن مصر 2010 - ليها فكر تانى .
( متشعلق ) فى كاس الأمم و أبطال أفريقيا و السوبر .. و أزمة الزمالك و قضايا ( مرتضى )
و عصبية ( حسام ) .. و تسخين ( مدحت شلبى و خالد بندق )
و يالا اقرا الخبر ...

طيب فين علم مصر إلى عبر القناة ؟؟؟

دور هتلاقيه .. خيال بعيد فى عيون ( عيل بمريله ) – نعسان بيسأل باستغراب .. هو التلت
الأخير من العلم .. بيزيد ليه ؟
وتا – ترات – تا ... مصر .

راح أهتف لوحدى