خالى شغل - ( 5 )

بعدما ( قفشت ) نمرة المخرجة / ماجد ( كما ورد ذكره فى السابق ) ... قلت أكلمها .. رحت السنترال ( طبعا قبل ما تنتشر تكنولوجيا الموبيلات عندى ) ...

- اطلب ليا النمرة دى لو سمحت ؟

- ترررررررررررررن ... و أخيرا صوت ( بيقول آلو )

- بسرعة البرق نطيت بلسانى جوا السماعة ... ألو

- أيوة ؟

- استاذة ( م ) ؟

- أيوة

- مع حضرتك إسلام إل كلمك عليه أستاذ ( ع )
- أيوة أيوة ( بنبرة فيها اهتمام ) .. و أنا جوايا قلت ( خير بالجامد ) .. معلش يا إسلام كنت تعبانة المرة إل فاتت

- ( أكلشيه محفوظ ) ... / ألف سلامة .

- طيب إنت عايز تعمل إيه بقه ؟ و لا بتعمل إيه

- أنا حضرتك بكتب برامج و نفسى أكون مذيع

- طيب .. أوكى ( تعال ليا القناة ) عارفها إل هى فى باكوس

- بحماس ( طاير حاير ) .. أيوة طبعا عارفها

- طيب تعال ليا الساعة 5 بكرة و استنانى و معاك حاجة من إل بتكتبها

- أوكى .. شكرا ( و جوايا فيه فرح عمدة بدأ )

حطيت السماعة ( متخدر ) ... مشيت ( متخدر ) ... دخلت البيت ( متخدر ) و عقلى رايح جاى يقول ليا ( بس كده خلصت ) و هذيع النشرة قريب

- هلبس إيه ؟

- هاخد أى برنامج معايا ؟

- أروح في إيه ؟

جريت على ( دوسيهات البرامج ) المكتوبة بخط اليد ( كانت لسه تكنولوجيا الكمبيوتر مشرفتش عندى )

و قعدت اقرا اسامى البرامج ( الزائر ) ... ( الدايرة السودا ) ... ( خط أحمر ) ... و الكلام ده كان إمتى كان فى حدود 98-99

و جوايا بقه 100 إحساس .. و كمان نفسى أطلع لسانى لكل حد عمال يقول ليا ... إعلام إيه و بتاع إيه ؟ ...

و قعدت أعد الساعات لغاية بكرة

و جه بكرة

عملت إيه ؟ حصل إيه ؟ .. شفت إيه ؟

" أفضى و اكتب لكم "