واد قليل الأدب - ( قصيدة عامية )

بعترف إنى .. واد قليل الأدب
لا اتعلمت ... و لا اتفطمت
ولا حتى لما كبرت آمنت
بقوله " بابا "
.... و بقيت فى ( الملف السرى )
واد .. قليل الأدب .
مع إنى " مزروع "
فى قلب شوارع عصبوها
بصورة " بابا "
ولامم فى ضلوعى بيوت جنسوها غصب ... باسم بابا
و كل يوم " بلدى " تبقى
" بابا " ...
سنة وحاضنها سنة
وبقوا 30 سنة .. يالا العجب .
و أنا ... خبونى فى " بنطلونى الساقط .
وقعدة - شات
و عقل من الركنة مات
و ضل بيقاوح هبابة "
... و سكاتى بقه حق وجب
قانون عليا ... و أدب

طب ممكن أعرف ليه ... ؟؟
" ولا " ... شات آب .. وافتكر
بابا ...
هو إل بنا .. بابا هو إل خدنا و عبر
هو إل حيا
وهو إل قبر ...
يعنى من الأخر ..ورينا منك شوية أدب
ده " بابا " قدر من ورا القدر
انكتب

بس أنا لا عرفت أكون حرف جر
ولا أغنية " بايته "
بتسقى فرحتها من " رحم "
المر
ولفيت نفسى ... بشمس عفيا
و رفعت آهه بطول و عرض
الميدان .
وحقى يهز الأرض .. بفرض حق أصيل ليا
و هناك ليا
و هنا ليا ...
و امبارح ليا
و بكره ليا

و اسأل من التحرير .. على الواد نجم
تلاقاه خلاص عدى على السنين
" ببقرة حاحا "
سامعنى .. يا بابا
مش هقول تانى " بابا "
ولا جيلى .. هيعرف بابا
لأنى .. اسقطتك يا " بابا "
و عزلتك يا بابا ..
و ... شهد ليا العالم بأدب .
و أنا بلملم " حشايا " .. من إيد " بابا "
إل سرق
و قتل
ونهب .