قالوا ... ( قصيدة عامية )

قالوا ...
قلمك حزين ... مفهوش بكرة .
وخال من شبح نسمة
ممكن تعافر من جوه القلق و الخوف
بفكرة
بنقرا ليك ( آه )
و توجعنا منك ألف ( آه )
ياشاعر حزين .... بقلم مسكين
مش عارفين ... ياترى ده على صفحتك
قدر ؟
و لا إنت كده لنور بكرة
بتكره ؟
و قالوا ...

قالوا ....
دلع كلامك شوية ...
ذوق و روق و شيل و حط فى القصيدة إل جاية
خلينا نشوف تل الورد
و نسمع من قلب " قرارى "
حكاية ملفوفة فى ديل جنية
تعدى بينا شط النهارده
و يبقى قلمك مجداف
وورقتك الدافية
معدية
و قالوا ....

و قالوا ..
صحى قلمك المعجون شقاوة
و اخطف من ندى الصبح حبة " نداوة "
و اشجينا
و احينا
و ارقينا ... بكلام الحب
يزرع فنيا شمس
عفية
تقتل ... رماد سحابة شتا
معدية
" بكل درجات الغباوة "
و قالوا ...

قالوا
اشعر
ياشاعر و دور كاس المشاعر
اكتب للنهارده
و بكرة
وعن ضحكة راقدة فى حضن
زمن عايز الراجل
الراجل
فارس فى معركته المستمرة
" بلا هداوة "
,,,,, و قالوا ...